En echte Schwiizer

I bi immer pünktlich, nie z spot.

au wenns ums Zahle vo de Stüre goht.

Nu bim Astoh und warte vergoht mer d Geduld,

aber heinomol - das isch jo nöd mini Schuld!

I bi immer apasst, falle nie uf,

hebe dure, han en lange Schnuf.

Nu bim Autofahre zeigt sich s Temperament,

aber heinomol – wenn do eine d Tafle wieder nöd kennt!

I bi immer fründlich, grüesse alli Lüt,

sogar i de Stadt, jawohl das macht mir nüt.

Nu wenn öppis nöd lauft, wien i gern hett,

jo heinomol, denn bin au ich nümmä nett!

I bi korrekt, i allne Sache,

und nei, du muesch etz gar nöd lache!

Nu wenn öpper halt so gar nöd gnau schaffe tuet,

jo heinomol, denn wird’s heiss, mis Bluet!

Es bitz en Bünzli, das muess mer hützetags sii

und en richtige Schwiizer, hett immer s Sackmesser debii

Chasch demit en Stock zum Brötle schnitze

chunsch debi nöd mol is schwitze

chasch uf d Wurst din Name ritze

demit dir niemert de Cervelat chan stibitze

Verchlinere chasch ganz viel demit

und hesch gseh, all die Funktione wos no git?

Mit em Scherli irgendöppis stutze,

en Stachel entferne, d Nägel putze.

Üses Sackmesser, das chan allerhand,

drum isch es so bekannt i üsem Land.

Jo, so isch das mit em echte Schwiizer-Sii,

etz d Frog a dich: Hesch au du eis debii?