De Bär im Lauch

Fan-ta-sie. Oh, ich liebe sii.

Sie isch fantastisch, d Fantasie.

Und i hoff sie wird au hüt bi mer sii.

I hänge inere Matte dusse im Garte,

und Gedanke tüend uf es Spiel warte.

Entdeckä plötzlich en Bär wo im Lauch ine sitzt,

gsehn wien er ohni Zweifel en Pack Chips stibitzt.

Doch er hett a de Hand no en Schueh a,

debi hetti er besser es Messer mit me Spitz dra.

Er isch en Afänger, Fehler macht er drum,

es fehlt a de Hand, de Griff isch z chrum.

Ha denkt de Bär isch schlau, doch er frogt besser de Meier.

Suscht gits halt Fisch, vilicht hilft ihm de Reiher.

Bald dunklets scho, de Obet wird rot.

Und so gits för de Bär und mi hüt Obig es Brot.

Ich heb mis Ei i de Hand wo ohni Phone nüt wert isch.

Mache no es Foto, wo kein Graf sondern en Bär druf isch.

D Ziffer wo ihres Blatt verlore hett,

seit zu jedem Einzel, es seg gli Ziit förs Bett.

Vor em Schlummer, sölls no en Trunk geh,

Und so wunder mi, was ich i de Bar so gseh.

Es Fanta, Sie, das wär etz nett!

Jo, echli Fanta, Sie, wär sehr adrett.

Fan-ta-sie. Oh, ich liebe sii.

Sie isch fantastisch, d Fantasie.

Und i hoff sie kehrt immer wieder bi mer ii.