Hilfe, hilfe!

Hilfe, hilfe! Hesch es au ghört?

I bi grad am Bode une zerstört.

Hilfe, hilfe! Hesch die Bilder i de Medie gseh?

So viel Schlimms isch wieder gscheh.

Hilfe, hilfe! Hesch es au entdeckt?

D Medie warnet vor dem, wo i üsne Putzmittel steckt.

Hilfe, hilfe! So viel Gift hani i mim Schrank,

wer weiss, vilicht bini jo scho richtig chrank.

Hilfe, hilfe! Hesch es vernoh?

D Medie rüefet mit de Finanze wirds bergab goh.

Hilfe, hilfe! Was isch das doch för e Welt,

numme regiert vo Macht und Geld.

Hilfe, hilfe! Hesch es gseh?

I de Medie stoht, s wird bald di bescht Version vo üs geh.

Hilfe, hilfe! Fitness, Ernährig, Longevity,

säg, för was söll das überhaupt nötig si?

Hilfe, hilfe! Hesch es au glesä gha?

De Chrieg, schreiet d Medie, isch bald da.

Hilfe, hilfe! Was chönd mer tue

und wieso loht mir das alles au Znacht kei Rueh.

Hilfe, hilfe! Ich han doch nu vertraut. De Medie hani früehner fascht alles glaubt.

Hilfe, hilfe! Gwandlet hett sich die Ziit,

und debi hett d Gsellschaft s Gfühl, sie seg fortschrittlich wit.

Hilfe, hilfe! Alli die News sind nöd gsund.

Tag und Nacht prasslets ine, Stund för Stund.

Hilfe, hilfe! Blitzschnell wird üs alles mitteilt.

Isch es denn wörkli so, dass alles eilt?

Hilfe, hilfe! Wo blibet all di schöne Sache. Die wo guet sind förs Herz und die zum Lache.

Hilfe, hilfe! Vielne vo üs würds demit besser goh, vilicht müend mer doch zruck uf de analog Weg cho.

Text aus der Schreibzeit Januar 2026