Wiehnachtä, mol anderscht

Träum mit mir vo Wiehnachte, vo Liechter und vo Schnee,

vo glückliche Gsichter, so wie mers im Bilderbuech chan gseh.

Vor üs stoht en Christbaum ghüllt in es glitzerigs Kleid

und drunder liget liebevoll ipackti Gschenkli bereit.

För eimol anderscht Wiehnachte fiire, chum träum mit mir,

so traditionell – i finds inzwüsche nämli scho chli stier.

Wie wärs, för eimol Wiehnachte sogar usfalle z loh?

Mitenand deför uf e schöni Reis z goh?

Wie wärs, Wiehnachte uf ere warme Insle z verbringe,

statt «Oh Tannenbaum» chönted mer «Coco Jambo» singe.

A dem traumhafte Fleck, umrahmt vom Ozean tüüfblau,

lueget mer ume und stuunet eifach: «Wow!»

De ganz Tag wöret mer i Flip Flops umelaufe,

müessted nöd hetze zum Gschenkli chaufe.

I de Hängematte ligge, en Drink i de Hand,

wer vermisst scho s trüebe Heimatland?

Statt Wiehnachtsstress am Strand verwiile,

statt d Stube schmücke nomel e Rundi Charte spiele.

Tüend noch Luscht und Luune d Ziit vertriibe,

chönted scho no es Wili a dem Örtli bliibe.

Doch denn stört e Nochricht uf em Handy üseri Rueh,

mer hends uf de Reis debi, es ghört halt dezue.

E Foti mit allne Fründe vor em Christbaum dehei,

dezue d Wort: «Schade, seid ihr nicht dabei».

Wiehnachte uf ere Insle, das wär schön und guet,

aber langsam wör er üs verloh, de Muet.

Es bitzeli Heiweh – das chas scho mol geh,

doch d Sehnsucht wird grösser, mer möchted üsi Liebschte gseh.

Und so träumet mer vo Wiehnachte, vo Liechter und vo Schnee,

vo glückliche Gsichter, so wie mers im Bilderbuech chan gseh.

Vor üs stoht en Christbaum ghüllt in es glitzerigs Kleid

und drunder liget liebevoll ipackti Gschenkli bereit.